حكاية أسواق جمبرى الغلابه " الجمبرى الكداب فى الإسكندرية ومدن القناه

كتب : طلعت الطرابيشى

بتحب الجمبرى .. سؤال غير متوقع .. مين مابيحبش فواكه البحر .. عائلة القشريات " الجمبرى , والإستكوزا , والكبوريا "  أحلى وأطعم وأشهى أكلة سمك .. مش مختلفين . لكن سمعت عن " جمبرى الغلابه " الطبعه الشعبيه منه اللى سعره " حاجه ببلاش كده " بـ 10 جنيه للكيلو  . .  يامثبت العقل.. 10 جنيه بس .. مش مصدق  ! أكيد مش معقوووووووول  .

ماتستغربش . خد نفس عميق وأدينى ودنك , وتعالى معايا أقول لك حكاية جمبرى الغلابه أصله وفصله والكلام الكتير حواليه . حقيقى فى جمبرى رخيص قوى .. أسعاره ولا فى الخيال . وحجمه هههو هههو جريت ريقى زى " الجامبو " أبو ربعماية , وخمسمية جنيه الكيلو .  زده طبعا علشان الفقرا , والناس اللى تحت خط الفقر اللى بياخدوا معاش التضامن وتكافل وكرامه يبرو نفسهم ويتبسطوا . يقدروا بتمن سندوتشات الفول والفلافل يفطروا , ويتغدوا , ويتعشوا جمبرى  . يساووا  راسهم براس الناس الأكابر " الهاى كلاس "  فى أكل وعزايم سمك الجمبرى .

الحكاية ومافيها قبل ماندخل فى التفاصيل . من كتر الطلب عليه , ووصفات طهيه وشويه , وسعره اللقطه . فى سوق السمك ليها 4 أسامى . معروف فى تركيا وقبرص الدول اللى زينا االى فيها بحار , وأنهار مياه حلوه بإسم " الشيكال " . وفى مصر معروف بأسمين جمبرى الغلابه , " والجمبرى الكداب " . طبعا مفيش علاقه بينه وبين كدبة إبريل . ده جمبرى حقيقى الخالق الناطق الجمبرى اللى سعره فى محلات السمك , والسوبرماركت 300 جنيه للحجم الوسط , ومن 400 جنيه لـ 600 جنيه وأكتر للجامبو الحجم الكبير . والبياعين بينادو بصراصير البحر , أو " السوبر بطارخ " . وفى منه اللى بيعيش فى الميه الحلوه .

ولزيادة معلوماتك عن أسواق جمبرى الغلابه . هى مش كتير . موجود فى 3 محافظات ساحليه بس . المعروفه ومشهوره بحلاقات السمك والصيد وهى , الأسكندرية , والسويس , وبورسعيد " مدن القناه " . وبره مصر بعض الدول زى تركيا , وقبرص . وممكن - لو – حبيت تخطف رجلك لحد أى محافظة من المحافظات التلاته . وأهى فرصه تجرب حظك , وتشوف بعينك وتضرب 3 عصافير بحجر واحد . تصيف , وتاكل لحد ما تقول كفايه  , وتشترى زى ماأنت عاوز . بمية جنيه أقل من تمن فرخه , أو كيلو لحمه تشترى 10 كيلو جمبرى كبير  . تقدر تعمل عزومه حلوه لأهل بيتك وجرانك اللى فى الشارع  . زى عزومات البهاوات اللى بيدفعوا فيها 5 تلاف , و7 تلاف جنيه غير " التبس "  , وتمن الخدمه وضريبة القيمه المضافه .

وبعيد عن كلام الدعايه , والناس التانيه اللى مابيعجبهاش العجب ولا الصيام فى رجب . الناس اللى جربت " الجمبرى الكداب " أو جمبرى الغلابه بيتغنوا بأكله , وبيكتبوا فيه شعر من حلاوته , وأسعاره , وبطارخه اللى ماينفعش فيها براد شاى بالنعناع . وشايفينه أحلى وأطعم جمبرى فى السوق . مفتخر وكبير وسعره يابلاش . وكله كوم وأصحاب المصلحه بياعين سوق السمك – اللى همهم جيبهم – شايفينه جمبرى محصلش .. مابيتبعش غير للحبايب , وسعره لقطه . وفوايده هههو هههو ماتتوصفش . بطارخ أيه , ولحم أيه , وفيتاميناته مفعولها زى السحر . بتخلى العجوزه صبيه , والرجاله اللى راح عليهم الزمن وشرب قهوه يبقوا شباب , ويربوا عضلات . أمال أيييييييييييه . جمبرى كداب بيفتن الناس .

أما الناس التانيه الشكاكين اللى مش عاوزين الغلابه ياكلو وينبسطوا . مش شايفين فيه حاجه حلوه خالص . بيقولوا عليه بلاوى كتير , وأضرار لحمه وبطارخه على صحة الناس هههو ماتتعدش – كارثه – من كوارث الزمن على اللى بيبيعوه , واللى بياكلوه , وحتى اللى بيسمعوا عنه وما بيبعتوش - شير - ورسايل تحذير لغيرهم  .

وممكن معرفة فوايد وأضرار صراصير البحر , أو الجمبرى الكداب " جمبرى الغلابه . أثبتت نتايج تحليل بعض الأطباء البيطريين للعينات إن الفوايد الصحيه تتلخص فى :

·       غنى بالبوتين , والأحماض الأمينيه الأساسيه , ويحمل نفس الفوايد الصحيه للجمبرى العادى . وليس بديل له . وهو أفضل من الحليب , أو اللحوم , أو الصويا .

·       الوقايه من أمراض القلب .

·       غنى بأومجا3 , وفيتامين بـ 12 مهم لخلايا الدماغ والصحه العقليه , وضرورى لغشاء DHA .

وبالنسبه لأضراره الصحيه . تثبت نتايج تحليل بعض العينات حسب رأى الدكتوره شرين زكى الخبيره فى جهاز سلامة الغذاء  , إنه غير صالح للإستخدام الأدمى ., وبينشر كتير من الأمراض فى الثروه السمكيه . وبيحمل نسبه عاليه من المعادن التقيله والكاديوم . ده غير الميكروبات والفطريات . وعنده شراهه لإمتصاص الملوثات , وبيتغذى على مخلفات المحاصيل والصرف . ده غير إنه بيتغذى على يرقات الحشرات المائية , والسمك الصغير , وصغار الضفادع , وعائلات لبلهارسيا .

ويمكن التفرقه بين شكل الجمبرى الكداب " صراصير البحر " , والجمبرى العادى " اللى إحنا عارفينه ومتعودين عليه " فى :

·       الجمبرى الكداب , أو صراصير البحر " جمبرى الغلابه " طويل الشكل . مختلف عن الجمبرى العادى اللى بيتميز بإنحناء فى قوامه " جسمه " .

·       الكداب أو صراصير البحر بيشبه العقرب . والجمبرى العادى غير الكداب من فصيلة القشريات شكله مميز .

·       الكداب أو صراصير البحر ملئ بالعضم , والشوائب , وأهدابه كتيره . على عكس الجمبرى غير الكداب .

·       يكتر وجوده وصيده فى الصيف . بعكس الجمبرى العادى صيف وشتا . 

·       الجمبرى الكداب سعره 10 جنيه للكيلو . سعر العادى الطازه يبدأ من 80 جنيه الكيلو للحجم الصغير .

أنا عملت اللى على وعرفتك حكاية الجمبرى الكداب اللى بيشبه العقارب وصراصير البحر , وفوايده وأضراره , والفرق بينهم فى الشكل . وإنت حر إشترى , أو إعمل إضراب . وخليك فى اللى تعرفه .