توقعات بانخفاض أسعار الأرز خلال أيام

كتب : طلعت الطرابيشى

أسعار الأرز بين توقعات السوق وتصريحات الغرف التحارية ووزارة التموين !

بعيد عن دعم رز بطاقات التموين  .. توقعاتك أيه عن سعر الرز الحر  ! هاياخد الناقه ويشرخ , ولا هايقل . التصريحات بتقول هاينزل . والمتفائلين بيقولوا هايقل عن سعر بطاقات التموين  . وفى كلام تالت بيقول العكس وبيشكك . " ماتستغربش " الكلام ماعلهوش جمرك .

 لوناوى تشترى بسرعه . ومش قادر تصبر يمكن يرخص .  نصيحتى – لو - مستعجل إشترى " أمرك لله " ماتترددش . مش فارقه 8 جنيه , ولا 12 جنيه فرق فى الكيلو .  كل وإنبسط وفرح بيتك " مش خساره فى لادك تدفع أكتر " – ولو – عندك وقت تنتظر كلام التجار , والغرف التجارية , ووزارة التموين ماعطلكش . هاتنتظر كتير . قدامك كذا (  Option ) إختار منهم اللى يعجبك . لكن – لو – عاوز رأيى ماتفكرش كتير لأن " نأبك هاييجى على شونه " . أشك   السعر ينزل . خدها قاعده أى حاجه بتزيد صعب تقل . وإنت سيد العارفين . التاجر اللى بيدوق المكسب بيطمع أكتر . وبيبرروا طمعهم إن " التجاره شطاره " , والسوق عرض وطلب . وإنت مش مجبر تشترى بالسعر الغالى . حقك تفاصل , أو تقاطع  .

" توقعات رئيس شعبة المواد الغذائيه  "

وسيبك من رأيى ممكن يكون صح , وممكن يكون غلط . وأكيد  مش على هوى كتير  , والمسئولين ضده 100 % .. ومنهم هشام الدجوى رئيس شعبة المواد الغذائية بغرفة تجارة الجيزه , اللى بيرجع زيادة أسعار الرز ,  إلى إستغلال بعض التجار فترة إنخفاض الكميات المعروضه بالأسواق قبل بداية موسم توريد المحصول الجديد , لرفع الأسعار . وبدأو رفع أسعار الرز من شهر يونيه الماضى . قبل موعد التوريد الرز الجديد بتلات شهور .  

وفى رأيه , إن أسعار الرز هاتقل كتير . وممكن يوصل سعر الكيلو إلى  9 جنيه . يعنى أقل من سعره فى بطاقات التموين .

وحجة " الدجوى " فى خفض الأسعار , إن مع بداية موسم توريد المحصول الجديد , واللى بتشهد الأيام دى بشاير موسم حصاده  . بتزيد الكميات المعروضه بالسوق , والسوبر ماركت  , والمحلات , فبيقل السعر , ولما الإنتاج الجديد بيدخل بكميات كبيره فى السوق  بيخلق منافسه بتكون لصالح المستهلك .

" توريد طن على الفدان مقابل دعم الكيماوى "   

ولزيادة رهانه على نزول أسعار الرز . يضيف رئيس شعبة المواد الغذائية , مع حملات التفتيش , وتحرير محاضر للمزارعين , والتجار الممتنعين عن التوريد . نزل سعر طن الرز بحوالى 3000 جنيه . وكان وزير التموين فرض على المزارعين , وأصحاب المزارع توريد طن عن كل فدان على الأقل , للإستفادة من صرف التقاوى , والأسمده والكيماوى بالأسعار المدعمه . ومعاقبة التجاراللى بيحجبه الرز فى مخازنهم , ويمتنعوا عن بيعه بمصادرة كل الكميات .

ومع إقتناعنا بالرأى ده , واللى بيتردد على لسان أكتر من مسئول بالغرف التجارية بالمحافظات , ووزارة التموين . الخلاف فى الرأى وارد . على قاعدة اللى بيزيد , مابينزلش ولا " بالبطبل البلدى " .

" حيل ومبررات زيادة الأسعار "

وفى غياب حملات مفتشى التموين , وتغليظ العقوبات , أصحاب النفوس السو , وتجار الأزمات بينتشرو , ويسيطرو على السوق . وعندهم ألف حجه وحجه لزيادة الأسعار . هاتسمع مصاريف النقل زادت , وتكاليف التعبية والتغليف زادت , وخامات كياس العبوات البلاستيك  زادت , وأجورعمال شيل الرز ونقله , وتعتيقه وتفريغ حمولات العربيات زادت , غير الكهربا والميه . ويقولو لك تمن الأكله لعيله 5 أفراد كانت من سنه  كام . وتمنها النهارده كام .

" فشل دعوات المقاطعة "

فى النهايه محدش هايغلبهم فى فرض سطوتهم , وتبرير حيالهم الجهنميه , ودس السم فى العسل . علشان نشرب طعم زيادة الأسعار . " أمال أيييييييييييييه " تجار مش سهله . وعارفين إن الناس هاتسلم مغلوبه على أمرها , وهاتشترى بأسعارهم . ومفيش حد هيقاطع . وهايشترى الرز بالغالى عادى جدا , وهايكلوا الكشرى اللى برضه سعره هايزيد عادى جدا . وكل اللى هايحصل . الناس هاتشتكى وتمصمص شفايفها  كل ماتشترى .

" عودة ريمه لعادتها القديمه "

أما عن تصريحات المسئولين عن خفض الأسعار فمفهاش جديد  فشنك . وتوقعاتنا بحكم تجاربنا السابقه . الأسعار مش هاتنزل , وإن نزلت هاتنزل جنيه , أو إتنين , وشويه شويه ترجع " الست ريمه لعادتها القديمه " تزيد من تانى . وبكره نشوف  ونفكركم إن سعر كيلو الرز النهارده فى المحملات مابيقلش عن 17 جنيه . والشركات اللى كانت بتبيع رز على أنه فاخر سعر الكيلو  25 جنيه . مش موجود بالمحلات  . رغم زيادة إنتاج السنه دى لأكتر من 4 طن للفدان .

" 1,1 مليون فدان مساحة زراعة الأرز "

وحسب بيانات وزارة الزراعه تم زراعة مليون و100 ألف فدان مساحات أراضى الرز الموسم الحالى 2022  . منها 720 ألف فدان موزعه على 9 محافظات هى , البحيره , والأسكندريه , وكفر الشيخ , والغربيه , والدقهليه , والشرقيه , ودمياط , والإسماعيليه , وبورسعيد . و150 ألف فدان تم زراعتها على المياه المالحه فى الأراضى الجديده الصحراويه , و200 ألف فدان تم زراعتها بسلالات الرز الجديده الموفره للميه .  

" 1,5 مليون طن حصة وزارة التموين "

وخطة وزارة التموين إستلام 1,5 مليون طن رز شعير السنة دى  . على أساس سعر طن رز الشعير حبه رفيعه 6600 جنيه , ورز الشعير عريض الحبه 6850 جنيه للطن . وهذه الكميات سيتم تحويله من خلال مضارب القطاع العام لرز أبيض . يتم صرفه على بطاقات التموين . وتشترط وزارة التموين توريد المزارعين طن واحد من إنتاجهم بالسعر اللى متفقين عليه قبل الزراعه , ويتصرفوا فى باقى إنتاجهم بالسعر الحر .

وكلام فى السر المزارعين يبيعوه لتجار الجمله , وشركات القطاع الخاص بسعر الطن 8000 جنيه . بزياده 1400 جنيه عن سعر وزارة التموين . ولسه ياهادى ماخلصناش كلامنا , وسعر طن رز الشعير إرتفع على أرضه .  وحذر فزر التجار هايبيعوا بكام . " تحب تاكل رز ولا تنام خفيف "  .