د. محمد فهيم يقدم 25 تحذيرا للمزارعين لمواجهة تقلبات الحرارة

دائماً بنقول إن لكل موسم خصوصيته في أنماط المناخ والموسم ده النمط الأبرز هو التقلب الكبير في أنماط الحرارة وزيادة فرق حرارة الليل والنهار (فترة دافئة يليها فترة باردة ثم شديدة البرودة ثم صقيع خفيف وهكذا ..)  

وكمان يعتبر موسم جاف جداً من ناحية الأمطار...  

زاد عليهم تشكل الشبورة الكثيفة لحد ضباب ودي طبعًا لها علاقة كبيرة مش بس بالأمراض ولكن العلاقة كبيرة جدًا بانخفاض كبير في معدلات الامتصاص وده باين على محاصيل كثيرة اليومين دول..  

وأتكلمنا كتير على موضوع البرودة المتأخرة وموضوع العشرة السلف من طوبة لأمشير، وفي ظل سيطرة المنخفض شديد البرودة والتدرج والتذبذب في انخفاض الحرارة ليلًا خلال هذه الفترة وتستمر حتى منتصف شهر أمشير على الأقل...  

لذا وجب علينا أن نستجيب للتحذيرات وننفذ التوصيات التالية:  

تحذيرات يتبعها توصيات  

التحذير 1: القمح  

عدم التأخير للريات خلال الفترة دي خاصة للمح المتأخر لأنه مش هيعمل قش ويكون محصول ضعيف... والناس تفحص غلتها كويس عشان الصدأ ده وقته وظروفه.. ومفيش رش وقائي.. وممنوع استخدام مبيدات الحشائش في العمر أكبر من ٤٠ يوم... ونفحص الغلة اللي داخلة على طرد عشان موضوع المنّ ولو ظهر يترش فورًا (أسيتامبريد + لمبادا 5%).  

التحذير 2: الفاصوليا الصيفي  

محدش يزرع فاصوليا صيفي قبل 12 – 15 فبراير والزراعة بشروط صارمة (هتلاقوها في منشور الفاصوليا الصيفي)...  

التحذير 3: البنجر  

محدش يصرف في البوتاسيوم للبنجر أكبر من 140 يوم زيادة عن اللزوم.. ويرش بورون 14% مرتين.. عشان موضوع السكر الكاذب.  

التحذير 4: البطاطس الشتوي

محدش يضيف أي منظمات نمو للبطاطس بعد 90 يوم عشان التحجيم.. فقط البوتاسيوم والكالسيوم.  

التحذير 5: البطاطس الصيفي

محدش يروي البطاطس مرتين ورا بعض بدون عزيق لأي سبب.. وممنوع استخدام اليوريا والدفعة الأولى من التسميد يفضل أن تكون 3 سلفات نشادر أو 2 نترات نشادر بنظام خط وخط.. استخدام اليوريا بكثرة بيسبب أنها في سنوات اللفحة بتبدأ من الأرض دي أو زيادة تشقق الدرنات في الأصناف الحساسة أو زيادة الإصابة بالمنّ... إلخ.  

التحذير 7: الفراولة 

محدش يكتر استخدام الأحماض الأمينية تمامًا.. دي فترة العفن الرمادي والعفن الطري وتجدد الإصابة بالتبقعات خاصة بعد انتهاء أيام الشبورة والبرد وزيادة الندى... والمهم أن التحجيم والتلوين يضعف مع البرودة ولازم التدخل العاجل...  

التحذير 8: المانجو

محدش يزيل الأفرع الجافة دلوقتي حتى يحدث جريان العصارة في الأشجار... ويجب الانتهاء من تقصيف نسبة من الأزهار للجيل الأول على نهاية الأسبوع عشان تعمل أكثر من جيل على الشجرة.. مع الرش الوقائي الهام جدًا ضد البياض الدقيقي خاصة في الشبح المبكر...  

التحذير 9: الفول  

محدش يرش أي نحاسيات أثناء التزهير والعقد.. مع الرش الوقائي (أزوكسي ستروبين + مانكوزيب) ضد التبقعات وإجراء كل إجراءات الحد من التنفيل (شوف منشور تنفيل الفول).  

التحذير 10: البصل  

اوعى تنسى رشة وقائية هامة ضد الأمراض الفطرية.. متستعجلوش رش المغذيات المكثف على البصل.. الكالسيوم مكون أساسي في التسميد والتغذية خاصة بعد صدمة مبيدات الحشائش...  

التحذير 11: الثوم  

متستعجلوش رش الكالسيوم بورون دلوقتي... وخليك في البوتاسيوم فوسفيت والماغنسيوم فوسفيت شوية... والرش الوقائي اللي لا يحتمل التأخير ضد اللطعة الأرجوانية (هي دي ظروفها)...  

التحذير 12: الخرشوف

اللي لازق وبيأخر الجمع قوي والورق بتاعه أبيض والنورة (الكوز) ضعيف وتحجيمه خفيف.. ما ترشوش أي أحماض أمينية أو منشطات.. فقط كالسيوم فوسفيت وسترات بوتاسيوم... واهتم قوي بمركبات التحجيم الآمنة (سترات/أسيتات/نترات البوتاسيوم مع سيتوكينين 4%)...  

التحذير 13: الكتان

إياك وزيادة التسميد الأزوتي، لأن القش ضعيف واللون باهت والتفريع ضعيف (بسبب البرودة) وعليه الاهتمام جدًا بمحفزات النمو وتنشيط الامتصاص، ولأن ده وقت الأمراض الفطرية (الصدأ والبياض الدقيقي) فبنحذر من زيادة الرش بالأحماض الأمينية، مع تكثيف الكالسيوم فوسفيت وسترات بوتاسيوم...  

التحذير 14: الكمون واليانسون والشمر

التحذير الشديد من أمراض الألترناريا والتبقعات والذبول (ده ظروفهم) وتكثيف إضافة الفسفور بالتبادل مع الكالسيوم فوسفيت وسترات بوتاسيوم... والتحذير من الإصابة بالتربس في الكمون والمنّ في الشمر...  

التحذير 15: البرسيم

محدش يأخر الحشة الحالية واخلصوا من الوش ده بدري عشان النبات يفوق بعد موجة البرد مع إضافة حامض فسفوريك مع الرية اللي جاية 10 لتر.  

التحذير 16: العنب المبكر 

عدم زيادة الأسمدة البوتاسية الفترة دي والعناية الفائقة بعالي الفسفور والكالسيوم (من دلوقتي لأن الكالسيوم لا يخزن ولازم إضافات حية)... ولو فيه عيون بدأت تتفتح رش بالكبريت الميكروني على طول...  

التحذير 17: الخوخ والبرقوق 

اوعى تطول الفترة بين الريات تحت أي بند، قصر الفترة بين الريات وأعطي ريات خفيفة على فترات قصيرة، واتبع خطوات الحد من التساقط الغزير للزهر أو العقد الحديث (هيكون فيه تساقط غزير الموسم ده فوق الطبيعي)...  

التحذير 18: الموالح

لا تأخر المعاملة باليوريا من 1 – 1.5% (هي دي وقتها)، وقبلها يجب الانتهاء تمامًا من التقليم والرش بالزيوت المعدنية الشتوية والحشري... والأهم أهمية الحقن بمبيدات أعفان الجذور والتقرح.  

التحذير 19: الزيتون

الزيتون أخذ احتياجات البرودة بتاعته بانتظام ومتوقع موسم تزهير كثيف وتقيل، وعليه التحذير من زيادة إضافة البوتاسيوم الفترة دي...  

التحذير 20: خضر الأنفاق البلاستيكية  

الفترة دي حرجة جدًا لخضر الأنفاق وممكن أي خطأ في مواعيد كشف البلاستيك يعمل صدمة للزرع...  

التحذير 21: القصب الخلف والغرس  

الفترة دي حرجة للقصب بسبب انخفاض الحرارة، والمهم جدًا عدم تأخير الريات، مع زيادة إضافات الفسفور...  

التحذير 22: محاصيل العروة الصيفية المبكرة 

محدش يستعجل زراعة العروة الجديدة سواء ذرة بدري أو لب أو خضر مكشوف ننتظر حتى بعد 15 فبراير...  

التحذير 23: مزارع المواشي 

محدش يزود من التغذية على البرسيم اليومين دول عشان نقص الفسفور على المواشي...  

التحذير 24: مزارع الدواجن 

لا ترفع درجات التأهب للبرودة لأن لسه قدامنا شوية...  

التحذير 25: مزارع الأمهات السمكية**  

محدش يغير المياه العميقة بتاعة الأحواض تحت البلاستيك...