قريبا .. كبار السوق الزراعى فى معرض الوادى لتقنيات الزراعة بالأقصر

طلعت الطرابيشى:
كبار السوق الزراعى فى مصر وبلاد بره  , هايكونوا كلهم بربطة المعلم معاك فى المعرض , وبين إيديك , يقولولك تحت أمرك شبيك لبيك . هاتشوفهم وتقابلهم قريب قوى بالكتير بعد 4 شهور فى أكبر فترينة عرض فى قلب صعيد مصر  - على نيل - محافظة الأقصر اللى فيها تلت آثار العالم . كل ده وأكتر هاتشوفه بنفسك فى معرض " الوادى لتقنيات الزراعه الحديثه " فى 19 من شهر مايو الجى .
" من طقطق للسلامو عليكو "
عندك فضول وعاوز تعرف أكتر . وماله تعالى وإكتب ورايا تفاصيل المعرض من طقطق للسلاموا عليكو . خد عندك ياسيدى .. المعرض السنه دى هايكون مفاجأة فى حاجات كتير خالص خالص . الراعى الرسمى للمعرض شركه "بريدج تريد " أشهر من نار على علم فى مجال تجارة وإستيراد مستلزمات الزراعه مجهزه مفاجئات للعارضين وزوار المعرض . فندق شتيجنبرجر نايل بلازا الفايف ستار رمز الفخامه على نيل الأقصر , هو المكان المفضل لإقامة فعاليات المعرض .  تنظيم المعرض , وطرق عرض المنتجات , وديكورات أجنحته فيها لمسات جماليه وذوق عالى . تقدر تقول شئ فاخر من الأخر .
" 110 شركه من كريمة السوق الزراعى "
والمهم والأهم مش فى عدد الشركات المشاركه فى المعرض واللى بيزيدوا على 110 شركه . الأكتر أهميه نوعية الشركات . واللى بتعتبر " كريمة السوق الزراعى " أكبر وأهم الشركاتاللى ليها إسم وسمعه وعلامه تجاريه فى إنتاج مستلزمات الزراعيه فى مصر , والعالم . أصحاب ومديرين كل الشركات المشاركه هايكونوا متواجدين طوال أيام المعرض , ورهن إشارة زوار المعرض من ضيوف , وتجار , ومزارعين للتعرف عليهم , ومناقشتهم , والإطلاع على أحدث منتجاتهم ومعاينتها على الطبيعه فى أجنحة الشركات .
" فكره على السريع "
وعلى فكره المعرض مدته 3 أيام . والسنه دى هى الدورة رقم 18 لمعرض الوادى . وبيعتبر المعرض الزراعى السنوى الوحيد اللى بيتم تنظيمه على مستوى كل محافظات الصعيد . و معظم فنادق الأقصر من فئات الأربع , والخمس نجوم بتكون محجوزه فى فترة المعرض للإقامة مسئولى الشركات ومهندسيها وإدارييها , وشركات الديكور . وضيوف المعرض من كبار تجار وموزعين مستلزمات الزراعه , وخبراء الزراعه المدعوين , وممثلين الصحف والفضائيات , والمواقع الألكترونيه .
" 400 غرفة للتجار و38 رحله لنقل المزارعين "
وحسب كلام المهندس خالد أمين المدير التنفيذى لمؤسسة " عالم الزراعة " المنظمه للمعرض تم الإتفاق مع عدد من شركات النقل الساحى , على توفير 38 أتوبيس سياحى , لتسيير رحلات مجانيه لتسهيل إنتقال المزارعين من مزارعهم , إلى المعرض , وعودتهم لمحافظاتهم مره تانيه . وتضم الرحلات المزارعين من محافظات بنى سويف , والمنيا , وأسيوط , وسوهاج , والأقصر , وأسوان . وطبعا توشكى , وشرق العوينات . ده غير حجز 400 غرفه فندقيه من الفنادق المحيطة بقاعات المعرض , لإقامة ضيوف المعرض من كبار التجار السوق الزراعى من جميع المحافظات . وده طبعا علشان يسهل فرصة التعرف على المعروضات , ومقابلة مسئولى الشركات , والتفاهم حول نوعية الصفقات , والتسهيلات الموجوده , وكمان الإتفاق على نوعية الوكالات التجاريه لتمثيلها فى مصر .
والشغل الشاغل اليومين دول للشركه المنظمه , بالتعاون مع الراعى الرسمى ,  هو تحديد شكل الدعايه , ومراسم حفل الإفتتاح , وإستقبالات ضيوف المعرض , وتسكينهم بالفنادق . وكمان مفاجاة المعرض من الهدايا والجوايز اللى ممكن تتقدم لزوار المعرض , ومناقشة موضوعات الندوات , وأسماء الشخصيات , والخراء المحاضرين فيها .
" القايمه السودا للشركات المخالفه "
الحاجه الوحيده فى المعرض , اللى ممكن تضايق وتكسر بخاطر إخونا اللى مش ولابد بتوع بضاعة مصانع بير السلم , والسوق الموازيه اللى منتجاتها ملهاش تلاتين لازمه . يعنى زى قلتها ملهاش أى فاعليه , ومجهوله المصدر , عدم السماح بمشاركتهم فى المعرض , ووتشدد المهندس خالد أمين منظم المعرض , على تسجليهم فى القايمه السودا للشركات غير الملتزمه . وإلتزام المعرض بتطبيق دستوره على جميع الشركات العارضة . واللى هو بيتلخص فى حظر منتجات الصحة العامة , وأى منتجات غير مسجله . وتحرير محاضر لأى شركه مخالفه  للضوابط . "

معرض الوادي لتقنيات الزراعةمعرض الوادي السوق الزراعي آُثار العالم