حكايات عالم الزراعة حول البطاطس البنفسجية وفندق ديوان عام الوزارة

" اللمون .. والبطاطس البنفسجيه .. وفندق وزارة الزراعة .. وجليد القاهره "

طلعت الطرابيشى

_________________

أهلا وسهلا .. ومرحبيتين  فى حكايات على السريع السريع . قبل أى حاجه تسمح لى بدقايق من وقتك نخطف رجلنا لحد السوق نطوف ونشوف , ونتعرف على أحواله , وبالمره نسمع من الناس كل اللى شاغلهم اليومين دول . سعادتك فاضى , ولا مش ؟  رأيي تجرب مش هاتخسر حاجه !

بداية حكاياتنا عن اللمون " البنزهير الخضر والصفر " آه هو " الليمون " "  بس ده نطقه حسب سلو بلدنا " , واللى كله فيتامين سى  صديق العيله , اللى مفيش بيت فى مصر بيستغنى عنه . لزوم الشوربه , وتتبيلة الفراخ والسمك , وعلاج البرد . ده اليومين دول أكتر حاجه شاغله الناس ومدواخاهم السبع دوخات . ده خلاص إتجنن .. ركبه عفريت .. أسعاره " أجارك الله " ضاربه فى السما . الكيلو وصل لـ 60 , ز70 جنيه . حد يصدق اللمون اللى كان مرطرط فى السوق , ومابيزدش عن 6 جنيه . ولو هاتبحبحها قول 10 جنيه بالكتير . سعره زاد 6 مرات لأ وأيييييييه مفيش فصال . أمال فى شهر رمضان اللى بيكتر الطلب فيه على الحاج لمون هانعمل أييييييييه . وياترى هانقدر على بعاده !

اللمونه الحباية القله الصغننه اللى يدوبك تعمل عصره , وواللى كان يامكان البياعين بيدللو عليها بقت حاجه مهمه وغاليه ومش موجوده . شحيح قوى فى السوق ..   اليومين دول البياعين بيسوقوا دلالهم وبيتشطروا علينا . قال ونقيب الفلاحين الحاج أبو صدام عنده كلام تانى - أنا - مش مرتاح له . قال أييييه الشهرين الجايين اللمون إنتاج "عروة السلطانى " هايبقى بالويبه , وعلى رأى المغاربه بالزوفه . يعنى هايبقى كتير ياما ومرطرط فى السوق . ده حسب كلامه .

وبينى وبينك مشكلة نقص اللمون شكلها هاتطول شويه . لأن مساحة اللمون محدوده أقل من نص مليون فدان بس , وأحوال الجو مش تمام , ونظام الرى اللى بيستخدموه الفلاحين بالغمر أو بالرش مش سليم . وكمان بيزرعوا شتلات لمون بذريه غير مطعومه . يعنى الأمور مابتطمنش . وكله كوم ومشاكل إصابة شجر اللمون بمرض " التصمغ " كوم تانى . لأن المرض ده " الشر وبعيد " بيخلى ورق شجر اللمون يصفر ويدبل ومايطرحشى لمون . وطبعا النتيجه معروفه الشجر يبقى زى قلته مفيش إنتاج .. أو قليل . مش بس كده زيادة الإصابه بيسبب موت للشجر . وياريت كده وبس شجر اللمون بيقى عرضه للإصابه " بدودة أزهار اللمون " , و" ذبابة الفكهه " , و" صانعة الأنفاق " كفايه لحسن الضغط يعلى عليك .

نسيت أقولك مش بس إحنا اللى بنصوم . شجر اللمون هو كمان له صيام . صيام أصغر وصيام أكبر . وبيقوله عليه " تصويم " شجر اللمون . يعنى تعطيشه بوقف الرى فى الأراضى الطينية " محافظات الدلتا " , وأراضى الصعيد اللى على النيل , وتقليل الرى فى الأراضى الجديده الصحراويه , لأن أراضيها مابتحتفظشى بالميه زى الأراضى الطينيه . وبيكون الصيام الأصغر لشجر اللمون من عمر 6 سنين , لعمر 10 سنين , والصيام الأكبر للشجر عمر أكبر من عشر سنين .

ولمعلوماتك اللمون اللى بنزرعه فى مصر  تلات أنواع " بنزهير , ويوركا , وأضاليا " والنوع التالت الأضاليا حجمه كبير . ولمون " البنزهير " أشهر نوع معروف عندنا , وبنصدر منه للدول العربيه . والنوع التانى " اليوركا " غير معروف ومعلوش طلب فى مصر . وبيتم تصديره لأوربا , وبعض الدول العربيه هو اللمون أضاليا . والكيلو من " الأضاليا " فى السوق اليومين دول بـ 10 جنيه وممكن تفاصل فى السعر كمان . وده مش متعودين عليه معلوش طلب عندنا . وإن كانت الناس مجبره على شراه بديل " البنزهير " لأن سعره حنين وعلى قد الحال  وهو كله عصير .

·      الطماطم والبندوره " أشهر مجنونه فى مصر " باى باى

الطماطم زى ماإحنا عارفين من يوم ماوعينا على الدنيا " مجنونه " رسمى نظمى فهمى . قال أيييييه على أخر الزمن خلاص لقوا لها علاج , وخلاص هاتبقى صاغ سليم .. بيقولوا هايرجع لها عقلها وهاتبطل شغل جنان . أصل مركز البحوث الزراعيه إكتسف علاج لجنانها . خلاصة الكلام البرنامج الوطنى لتقاوى الخضار والفاكها بمركز البحوث الزراعية نجح فى إستنباط 8 أصناف تقاوى جديده للست طماطم هانم . وتم تسجيل صنفين منهم .  والأصناف الجديده حسب وصفهم " ميجا سوبر " يعنى حاجه عظمه وهاتعمل إنقلاب كبير فى زراعة الطماطم فى مصر . يعنى هاتحل كل مشاكلها ومش هايبقى فى أى أزمات تانى فى السوق . الفدان من التقاوى الجديده بيدى إنتاج من 35 , لـ 40 طن . بزياده 20 طن عن كل أصناف التقاوى القديمه اللى شغالين بيها " إبسط ياعم " . بكره الطماطم " البندوره " على رأى أهل الشام والخليج بالتقاوى الجديده عقدتها ويتعدل حالها وترطرط فى السوق طول السنه .

·      لأول مره فى مصر بطاطس تحمير بنفسجى أرجوانيه

من يومين قول تلاته أربعه , إتنشر خبر حلو لدرجة إنه فتح نفسنا على الأكل . الخبر الحلو " اللهم إجعله خير " كان منشور فى عدد كبير من المواقع الألكنرونيه , والصحف اليوميه بيقول نجاح تجربة زراعة نوع بطاطس أرجوانيه لونها بنفسجى لأول مره فى مصر . وهات ياكلام على لسان الحاج أبو صدام الشهير بنقيب الفلاحين . ملخص الخبر المنشور وعلى مساحات كبيره عدد مميزات كتيره للبطاطس البنفسجيه لست البيت فى التحمير , وإن طعمها حلو قوى مايتشبعش منها , ومابتشربش زيت القلى . يعنى هاتوفر زيت . ده غير فوايد غذائيه تانيه ياما . والأهم إن فيها مركبات طبيعيه بسبب لونها البنفسجى " بصراحه البنفسجى يتحب " , ومن بين العناصر الغذائية المهمه فى البطاطس الجديده أم لون بنفسجى , واللى بيسموها فى بلاد بره " البطاطس الزرقا " غنيه بالألياف , وفيها فيتامين سى , وفيتامين ألف , ومفيده لمرضى السكر . بسبب إنخفاض نسبة الكربوهيدرات فيها .

وعلشان ماطولشى عليك , البطاطس الزرقا , واللى فى نفس الوقت بنفسجيه وأرجوانيه والعهده على " الحاج أبو صدام " لها مزايا تانيه كتير عن البطاطس العاديه بتاعتنا اللى " بتشرب الزيت شرب " خد عندك خاليه من الأمراض , وبتصلح للزراعه فى الأراضى الصحراويه , ومع تغير المناخ بيزيد إنتاجها " وبتنفش " , وطبعا التقاوى البنفسجيه دى مستورده من بلاد بره , ولها شعبيه كبيره فى كل البلاد المتطوره والمتقدمه عننا . بس مشكلتها الوحيده فى مصر سعرها غالى , والناس عندنا مش متعوده عليها . ومن عيوبها مابتشربش زيت القلى بتاعنا . يعنى زى بطاطس خواجه مش مطبعه بطبعنا .

المهم ماتفرحشى قوى لحسن يطق لك عرق بعد نشر خبر " البطاطس الزرقا " أم لون بنفسجى  بيومين قول تلاته . نفس المواقع والصحف اليوميه كذبة الخبر على لسان المستشار الإعلامى لوزارة الزراعه أحمد إبراهيم . يعنى الحكايه كلها طلعت " شيش بيش " كانت إشاعه .. فيلم هندى .. إفلاس صحفى وإعلامى . والغريب الحاج أبو صدام ماكذبشى الخبر , ولسه مكمل عايش الدور . " أكيد لساه نايم "  .         

·      تحويل مبنى وزارة الزراعه التاريخى لفندق فايف ستار

إذا كان لسه عندك وقت . الخبر ده جديد وتفاصيله خاصه بزيارة الشيخ عبد المحسن الحكير رئيس مجلس إدارة مجموعة الحكير السعوديه لمصر , وتقديمه عرض لوزير الزراعه الدكتور علاء فاروق , لإستغلال مبنى وزارة الزراعه التراثى العريق فى منطقة الدقى بنظام حق الإنتفاع لمدة 50 سنه , بغرض تحويله لفندق سياحى فاخر 5 نجوم . وعلشان مايحصلش تكذيب للخبر نشرت وزارة الزراعه بيان صحفى على صفحتها الرسميه بتفاصيل الزياره , وإستقبال الوزير للشيخ الحكير . ومعلوماتنا العرض السعودى إتوافق عليه , ووبسرعه وفى نفس القعده . لأن ده ماشى مغ رغبة الدوله فى إستغلال المبانى التارخيه فى مشروعات سياحيه وثقافيه . ومن ضمنا المبانى التاريخيه مبنى وزارة الزراعه وحاليا مغلق وغير مستغل . بعدإخلائه ونقل ديوان عام الوزاره , وجميع مكاتب وكلاء الوزاره والموظفين للعاصمه الإداريه الجديده .

ومن الناحيه التاريخيه مبنى الوزاره القديم كان تبرع على سبيل الهبه من الأميره فاطمه كريمة الخديو إسماعيل , هو ومبنى المتحف الزراعى ضمن أراضى أملاك الأميره بالدقى . وبداية إنشائه كان عام 1913 من 112 سنه بغرض إستخدامه مقر إدارى لجامعة القاهره , واللى كانت زمان بإسم " جامعة فؤاد الأول " . ولظروف تم إستخدامه مقرا لديوان عام وزارة الزراعه عام 1930 . على فكره جامعة القاهره بتعتبر تانى أقدم جامعه مصريه , وتالت أقدم جامعه عربيه بعد جامعة الأزهر , وجامعة القرويين فى المغرب .

·      غرائب قاهرة المعز تحت الصفر 2025

بمناسبة الكلام اللى داير اليومين دول عن تغيير المناخ , وأحوال الجو اللى شغال شغل عفريت .. مره فوق ومره تحت . صدق أو ماتصدقشى القاهره الكبرى واللى بضم 3 محافظات القاهره , والجيزه , والقليوبيه , جوها اللى كان حر جاف فى صيفا دافئ ممطر فى الشتى على رأى فيروز . راحت أيامها . ودخلت مناخ دول لبس الفرو .. والجلد أبو بطاه " لزوم بلاد " الإسكيمو "عائلة القطب الشمالى المتجمد اللى درجة حراره تحت الصفر وإنت نازل  . الخبر الصدمه , والل غريب بعقل بيقول إستعدوا لتعرض مصر لمجموعة منخفضات بارده تلج اليومين الجايين  . يعنى هانتكتك من البرد ونموت فى جلدنا , ومحدش هايسلم من الـ 1000 ونزه . وكان خبير البيئه والمناخ الدكتور تحسين شعله صرح لقناة صدى البلد , إن فصل الشتا اللى إحنا فيه هايكون قارص شديد البروده , ودرجات الحراره هتوصل لدرجة صفر مئويه . ووضح دكتور شعله إن درجات الحراره الصغرى هاتسجل صفر مئويه فى القاهره الكبرى خلال شهريناير الحالى وممكن تنزل لتحت الصفر , وإن البروده هاتستمر  ليوم 14 فبراير من الشهر الجاى . وقال " شعله " إن فصل الشتا هاينتهى فلكيا فى 20 مارس . وتوقعاته إن الصيف مش هايكون ساخن , أو شديدة الحراره زى السنه اللى فاتت 2024 , وهاتكون معتدله , ومتوسطه بين36 , و37 درجه مئويه . المهم فى كلام الدكتور " شعله " اللى يسيب الركب اللى إسمه مش ماشى مع تصريحاته .