جولات " عالم الزراعة " ترصد غرائب وطرائف حكايات السوق المصرى

وقف الحال فى مزادات القطن وحكاية الدره السودا والفراوله البيضا وسوق البروتين

طلعت الطرابيشى

ـــــــــــــــــــــــــــــــــــــــــ

خد راحتك وكمل فنجان قهوتك . وياللا بينا على السريع السريع نبتدى حكاياتنا فى جولة " عالم الزراعه " . أوعاك تترد وتعمل زى الناس اللى بالك فيهم , وتقول " مفيش فايده " . خليك إيجابى مش هاتخسر حاجه !  جرب وإسمع بكره أكيد أحسن من النهارده .

نبتدى حكايتنا بالقطن " الدهب الأبيض " اللى كان المحصول " الكينج " فى مصر ويره مصر . مشاكله ومزادات تسويقه أكتر حاجه شاغله الفلاحين وقلقه راحتهم اليومين دول . كلنا عارفين إنه ماعدشى زى الأول زى حاجات تانيه كتير . ودمه متوزع بين " القبائل " الحكومه والفلاحين وشركات القطن . لكن وللحقيقه الدوله مش ساكته , وشده حيلها على الأخر علشان يرجع لمكانه . وبتعمل حاجات كتير للفلاحين علشان ترضيهم . دعمت لهم السماد , ووفرت بذرة القطن قبل الزراعه , وكل سنه بتضيف مساحات جديده للزراعه . ده غير إنها فكت الكيس على الأخر علشان تجدد مصانع النسيج بالمحله , وتشترى لها أحدث المعدات والألات . وكله لجل ماترجع قلعة صناعة النسيج أحسن من ماكانت . يعنى الحكومه مش مقصره ! لأ وناويه تقطع الطريق على تصدير القطن الخام . واللى بيتصدر برخص التراب . وبنرجع تانى نستورده متصنع ملابس جاهزه ومنسوجات بالسعر الغالى وبالدولار . وعلشان تشجع الفلاحين على توريد إنتاجهم . قامت رفعه " سعر توريد القطن " اللى بيسموه " سعر الضمان " لعشرة آلاف جنيه للقنطار إنتاج محافظات " الصعيد " وجه قبلى  , و12 ألف جنيه لقطن وجه بحرى . وكملت جميلها بخفض تصدير القطن الخام للنص . مش بس كده قررت حظر تصديره من السنه اللى جايه .

لكن ياخساره الحكومه " طبخت الطبخه ونسيت تحط شوية ملح " كل اللى عملته ضيعته بإهمالها مشكلة التسويق . مش بس كده سابت الفلاحين يواجهوا مصيرهم مع جشع التجار , وشركات القطن الخاصه , والسماسره يتلعبوا بيهم فى المزادات . وحسب كلام الفلاحين كل المزادات اللى إتعملت لشرا القطن فشلت . لأن التجار والشركات ملتزموش فى المزادات بالسعر اللى حددته الحكومه . ده قللوا السعر أكتر من 2000 , و3000 جنيه للقنطار . وحتى مش عاجبهم . غير إن الشركات رفعت سعر كراسات دخول المزادات على الفلاحين من 50 جنيه , لأكتر من 150 جنيه لكل مزاد . والنتيجه الفلاحين قاطعوا المزادات ورفضوا توريده . وخزنوه لحد مايشوفوا له صرفه . لأن سعر المزادات هايخسرهم كتير , وتكاليف الزراعه " حسب كلامهم " كانت عليهم بالغلى بعد زيادة سعر الدولار , واللى كان وصل لسبعين " لحلوح " لحلوح ينطح لحلوح . واللى خلى أسعار البذره يزيد . والسماد , والمبيدات يضاعفوا مرتين وتلاته . ده غير إن كتير من الفلاحين إتضرر زرعهم . بسبب تأخير الزراعه , وتسليم المحالج البذره فى مواعيد متأخره . وده غير إكتشافهم وجود عيوب فى بعض أنواع البذره . واللى إتسببت فى عدم نمو النبات , وتأخير نضج لوزالقطن .

وياريت الحكايه وقفت عند كده . أمال أيه تانى ؟ رفعت لى الضغط وجبت لى السكر . الخبر اللى أعلنته الحكومه مفاجأه من غير إحم ولادستور يوم الخميس اللى فات تحت عنوان " السماح لجميع الشركات بإعادة تصدير القطن وبدون حد أدنى " . قصدك الحكومه إتراجعت عن قرارها بوقف تصدير القطن . تخيل آه " كلام الليل كان مدهون بزبده طلع عليه النهار ساح وناح " . يعنى سحبت كلامها بعد إسبوع واحد من قرار وقف التصدير .  ده زى القصرى فى فيلم أولاد حميدو  .  وكمان بدل ماتقف فى ضهر الفلاحين سابتهم لوحدهم فى الطل تحت رحمة التجار والشركات الخاصه يتشطروا على بعض .

خلاصة القول مشاكل مزادات القطن فى رأى " الحاج أحمد عياد رئيس غرفة القطن بإتحاد الغرف التجاريه " عدم إلتزام التجار والشركات الشرا بسعر الضمان اللى حددته الحكومه . لأنه أعلى بكتير من السعر العالمى . وبيتقال إن ورا فشل المزادات فى تطبيق سعر الضمان الحكومى . إن السعر فى نظر التجار وشركات القطن مرتفع , ومفيش سيوله ماليه كافيه للشرا كل القطن - ولو - حتى ربع الكمية . والدليل إن لسه 450 ألف قنطار قطن باقيه من السنه اللى فاتت متسوقتش لحد النهارده ( ملحوظه إنتاج القطن يصل إلى 1,8 مليون طن ) . " وكلام فى السر "  التجار والشركات طلبو من الحكومه تديهم قروض بفائده  5 %  بدل من 30 % , لتوفير سيوله لتمويل شرا القطن بالسعر الحكومى . وطبعا الحكومه نشفت دماغها وقالت لهم لأ وألف لأ . " الحكومه هاتلقيها منين ولا منين ".

المهم بسبب وجود فرق سعر بين القطن المصرى وقطن بره , الشركات المصريه بتفضل تستورد على حساب القطن المصرى . وحسب كلام التجار  مصر بتستورد قطن طويل وقصير التيله  كل سنه لتشغيل مصانعنا فى حدود 3 مليون طن , ومابيتعداش حجم تصديرنا عن 300 الف طن " يعنى عقدة الخواجه هاتبقى ورانا ورانا " . من الأخر حل مشكلة تسويق القطن عند الحكومه , وإنها تتعهد بإستلام كل القطن من الفلاحين , أو تكلف الشركه القابضة التابعه لوزارة قطاع الأعمال بالشرا , وبسعر الضمان بعيد عن ألاعيب التجار وأصحاب شركات القطن الخاصه

·       زراعة الدره السودا

سبق لك الحظ تشوف " الدره السودا " , الدره بنت نسب عيلة المحاصيل الـ " BLAK " , أو تسمع عنها . خبر " الدره " الطازه والمشوى بنار الفرن كنت قريته على السريع السريع من كام يوم . واللافت فى خبر الدره " الحدوته " الغريب والطريف , وغير المألوف فى الأكل وأطباق السلطه , وعلف الحيوان . إنه بيخص مركز البحوث الزراعيه . وكان إتنشر تحت عنوان " زراعة الذرة السوداء الأغلى عالميا لأول مرة فى مصر " . وبعد فاصل من الدهشه والقهقها والضحك الهستيرى عالى الصوت , كملت قراية الخبر واللى بيتلخص فى نجاح عدد من الباحثين بمركز البحوث الزراعيه فى تجربة زراعة الدره السودا , وثبتت التجربه صلاحيتها للزراعه فى الأراضى الصحراويه الجديده فى مصر . يعنى من غير تفكير مابتحتجشى ميه كتير .. بترضى بقليله . ومناسبه للتربه المالحيه والرمليه والجيريه , وبتدى إنتاج حاجه خيال . يعنى 100 فل وعشره . غير إن سعرها هاى هاى .. أغلى من الدره بتاعتنا البيضا والصفرا أربع وخمس مرات . لأ وأيييييييه عليها طلب كبير قوى فى بلاد بره . يعنى تصديرها هايبقى على ودنه .

وكمان فوايدها ماقولكشى . خد عندك غنيه " بمضادات الأكسده " . وبالذات مادة " الإنثوسيانين " . وفيها فيتامين B المركب , وفيتامين E , وحديد والذنك , وبتحسن الهضم , وتعالج تصلب الشرايين وأمراض القلب , ووبيتقال إن طعمها فى الأكل والعصير و الحلويات حكايه .

·       الفرواله البيضا فى محلات الـ vip

أحب أشارك الناس الأكيله الإتكيت خبر جديد لسه " لنج اللنج " . الخبر ده " Special " ويخص محبى الفواتح " المحاصيل البيضا الـ " White " . تفاصيل الخبر إن فى مصر ظهرت ولأول مره فراوله بيضا . اللون كان غريب على , لكن الصدمه فى تمنها . , هى مش غاليه قوى .. يادوب الكيلو بألفين جنيه بس . يعنى " 200 دولار " , وموجوده وتحت الطلب فى محلات السوبر ماركت " Vip " . وبيتقال إن بياضها زى لون الحليب والزبده الجاموسى , وإن النوع ده من الفراوله بيتباع بالجرام , وفى محلات السوبر ماركت الكبيره فى مصر أقل وزن 100 جرام . المهم إن الفراوله البيضا فى إهتمام كبير فى مصر لزراعتها . لأنها فى نظر المصدرين من محاصيل الفاكهه إللى ليها أهميه إقتصاديه , وعليها طلب كبير فى الخارج . المهم فى الفراوله السودا اللى تخوف دى , الفقرا ملهمش حظ يدقوها , أو يلمسوها . لكن ممكن يبصو عليها من بعيد .

·       الترخيص 1646 لمشروع إنتاجى فى شهر واحد

من الحكايات الدسمه اللى كلها بروتين , ودهون غير مشبعه , وتجرى ريق الناس . حكاية هوجة مشاريع اللحمه اللى هاتشتغل قريب , اللى وزارة الزراعه ربنا يكرمها ويخليها لينا عملت اللى عليها علشان الناس تشتغل والأسعار تهدى شويه . وصل عدد مشاريع ومزارع الفراخ , وتربية  المواشى اللى رخصتها الوزاره السنه اللى فاتت اللى لسه معداش عليها إسبوعين 13 ألف و238 . وكلها جاهزه للشغل الأيام دى . يعنى فى كميات كويسه من " الظفر " اللحم والفراخ هايتوفروا فى السوق . وطبعا العدد ده من المزارع الجديده , مع المزارع الكبيره والكتيره الموجوده وشغاله السوق هايبقى عال العال والأشيه هاتبقى معدن . ده كان مضمون تصريحات الوزير دكتورعلاء فاروق , ونائب الوزير دكتور مصطفى الصياد , ورئيس قطاع الثروه الحيوانيه دكتور طارق سليمان , وكان مانشيتات الصحافه , والمواقع الألكترونيه وبرامج " التوك شو " الأيام اللى فاتت . وكان الدكتور قال إن فى شهر ديسمبر اللى فات صدر 1646 ترخيص . وده أكبر عدد من التراخيص صدرت فى شهر واحد .

المهم علشان خيالكم ما يروحشى لبعيد . الفراخ واللحمه مش هايزيدوا فى السوق من يوم وليله , واللى بيحلم إن السعر هاينزل ينسى , وياريت ماتولعش أكتر من كده . واللى مفكر إن هوجة التراخيص الكتير  كانت لمزارع جديده . يبقى إتخدع وحسبها غلط . التراخيص الكتير دى ماكنتش كلها لمزارع جديده . بعضها كان لمزارع جديد بس صغيره ولمربيين صغيرين , وأكتر التراخيص كانت لمزارع موجوده وبيتجدد لها رخصة التشغيل , ده غيرتراخيص مراكز تجميع اللبن فى المحافظات اللى ماتعتبرش مزارع لا لفراخ , ولالتربية مواشى .