تجميع اللبن وراء ضعف جودة الحليب وتراجع المبيعات وزيادة الغش

كتب : طلعت الطرابيشى

مصانع الألبان تعمل بربع طاقتها بسبب الإعتماد على اللبن المجفف " البودره "

من هنا لهنا لهناك , ولحد باب المصنع . تيك تيك تاك يوماتى على الحال ده حلقات تتكرر فى نقل وتجميع وتوزيع اللبن " الحليب الخام " . وعلشان مايبقى اللبن طازه وبخيره , وصحى وعال العال . لازما وحتما ولابد تحصل له إختبارات وتحاليل , وشروط تطبق بالساعه والثانيه والفيمتوثانيه . ده بقى بالظبط اللى بيتم قبل وبعد العجله مابتدور , وبيتهادى يخرج اللبن مترصص على السير متعقم  , ومتبستر فى أزايز وكياس للتوزيع . " أمال ايههههههههه "

" رعاية الرئيس السيسى "

 الموضوع مش سهل زى ماإنت فاكر . وأكتر مشاكل اللبن فى تجميعه . وعلشان مايوصلك وتطمن إنه متظبط تظابيط . يعنى فى السليم السليم , وخالى من أى ملوثات , أو شوايب , أو شغل شمال يعنى غش , أو مواد حافظه , إو غيره وغيره . لازم الحليب بسلامته  يمر على كذا خطوه , وياخد له كذا موافقه وتأشيرة . علشان ما يبقى ميه 100 ومطابق للمواصفات . والمفروض فى عالم الديجتال , والنانوتكنولوجى كل الخطوات دى تخلص بكبسة زر . وكان يبقى فله شمعه منوره  - لو – كنا إتشمللنا وطورنا مراكز تجميع اللبن , وزودنا عددها . لإنها زى مابيقولوا هى ضلع مهم فى نجاح المنظومه . وتعتبر حلقة الوصل بين منتجين اللبن الصغيرين اللى فى المنازل , والمزارع الصغيره , وبين شركات اللبن , ومحلات البيع . ورغم إن مشاكل مراكز تجميع اللبن كتاب مفتوح . يعنى معروفه للكل . لسه ياحبة عينى عامله زى بيت الوقف . مابدأتش تتحرك وتأخد الزخم والإهتمام اللى هو إلا لما إتدخل الرئيس عبد الفتاح السيسى فى 2020 , وخلاه مشروع قومى . وللأمانه المسئولين أول ماالرئيس بص لهم إتحركوا " درجن درجن " , وهاتك ياإهتمام , وعلى طول الزراعه إتحركت , ووراها الصناعه , والبنوك قدمت تسهيلات , وخفضت فوايدها . ورغم الشغل الفاخر اللى من الأخر ده لسه حركة تطوير مراكز التجميع ماشيه على مهلهه تاته تاته .

مركز نموذجى مطور لتجميع الألبان

·       وحسب رأى الدكتوره ناهد الوحش باحث أول بقسم بحوث الألبان بمعهد تكنولوجيا الأغذية , معظم مركز تجميع اللبن فى حاجه لمراجعه شامله وإعادة هيكله . فهى فى حاجه لتجهيزها بالمبردات , ومعدات التخزين , وأجهزة المعايره والتحليل .  لضمان جوده الحليب , وقياس نسب الدهون والبروتين , والحموضه , والبكتيريا فيه . وكمان للتأكيد إنه خالى من أى مسببات مرضيه . ولأن أى تطوير له تكلفه " والأيد قصيره والعين بصيره " , فاإحنا على الأقل محتاجين صبر أيوب لتطوير المراكز الموجوده واللى عددها 826 مركز . واللى كان 60 % منها موجود قبل 2020 . واللى إتطور منها خلال  الـ 5 سنين اللى فاتت من 2020 , وحتى يوليه 2025 مايزدش على 296 مركز . يعنى لسه بدرى , وقدامنا لينا وليك العمر من  8  , لتسع سنين كمان علشان بس نخلص من تطوير شوية المراكز الموجوده , وقبل مانفكر نضيف أى مراكز جديده .  

" مصانع اللبن فى مصر تعمل بربع طاقتها "

وده يخلينا نعذر شركات اللبن اللى قاعده تغنى ظلموه . لأنها صرفه مليارت علشان تشتغل وتكسب . مش شغاله جمعيات خيريه فتحه سبيل , علشان توزع مساعدات , وتكسب دعوات , وتشتغل  بربع طاقتها الإنتاجيه بس . علشان مشكلة نقص اللبن الحليب . وعلى فكره دا كلام " الباشمهندس أحمد غازى رئيس شعبه الألبان فى غرفة الصناعات الغذائيه ". وحسب كلامهم فى أكتر من 5 أسباب . أول سبب نقص اللبن , واللى تقريبا وصل لحوالى 2,4 مليون طن .  . وطبعا النقص ده جى من الفرق الكبير بين إنتاجنا الثابت عند 5,6 مليون طن فى السنه , وإستهلاكنا اللى بيزيد لأكتر من 8 ملايين طن . وتانى سبب النقص الكبير فى وسايل النقل المجهزة بالمبردات , اللى تحافظ على جودة الحليب طازه وقت نقله من المزارع , لمراكز التجميع . ومنها لمنافذ البيع , وشركات اللبن . والتالت ضعف الخدمات والتجهيزات الموجوده فى المزارع , ومراكز التجميع من تلاجات , وأجهزة تبريد لحفظ اللبن وتخزينه . ورابع الأسباب قلة الضمانات وشروط الدفع المتفق عليها بين شركات اللبن ومراكز التجميع , ومنافذ البيع " تجار التجزئه  " , وسلاسل محلات الجمله " السوبرماركت " . والسبب الخامس أزمة العلف وإرتفاع سعره . وطبعا ده أدى لهروب أصحاب المزارع من تحمل تكاليف التغذيه الغاليه للمواشى , وإستبدال العلف الغنى بالبروتينات والفتامينات , بعناصر ومواد أقل جوده وفاعليه منها , والتضحيه المواشى بالدبح , , لأن مكسب بيعها لحمه أكبر من تربيتها وإنتاجها للبن . والنتيجه إنخفاض إنتاج اللبن .

" مليار دولار حجم إستيرادنا من لبن البودره "

وبحكم إن رئيس الشعبه مسئول مهم قيمه وسيما , فكل كلامه وتبريراته عن نقص الحليب , وأزمة العلف وجيهه ومنطقيه . لكن تقول أيه  ؟ فى ناس تانيه " مابيعجبهاش العجب ولا الصيام فى رجب " شايف عكس كده - وبالذات – فى مراكز تجميع اللبن . وبيقولوا كلامهم مش " فير " غير صحيح . هاتقولى ليه وأيه السبب ؟ على كلامهم الشركات صاحبت غرض . وزى ماإنت عارف " الغرض مرض " . يعنى هى اللى قاصده ومتعمده تقلل كميات الحليب اللى بتشتغل بيها . تقدر تقول بتاخد ربع حاجتها بس . علشان تكمل شغلها " بلبن البودره " . لأنه أرخص من اللبن الحليب . وده طبعا عز الطلب . وكمان مضمون وجاهز للشغل من غير تضييع وقت فى تحاليل وإختبارات اللبن , وإستهلاك كهربا فى البستره والتعقيم  . ده غير إن اللبن المجفف " البودره " بيحقق المطلوب فى كل منتجات الألبان من جبنه , وقشده , وزبادى , وزبده , ومش . وطالما شركات اللبن مغرمه بشغل البودره . تبقى فرصه للمستوردين يزودوا فى الكميات اللى بيستوردوها . وأهو منها يرضوا " الزبون " شركات اللبن , ويضاعفوا مكاسبهم . وبتقدر قيمة شحنات لبن البودره اللى بنستورها كل سنه فى حدود مليار دولار .

" شغالين لسه على قديمه "

ومهما كانت مشاكلنا اللى بنعانيها من تأخير تطوير مراكز تجميع اللبن , و الكسل فى زيادة عددها . كل ده بيهون قدام بدائية وعشوائية طرق إنتاجنا للبن . وفى الوقت اللى العالم بيعتمد على الميكنه وشغل الأتوماتيك . لسه إحنا شغالين بلدى على قديمه .. لسه بنحلب بالطريقه اليدويه البدائيه . تمام زى ماإتعودنا عليها من قبل الميلاد . 83 % من إنتاجنا كده مفيش أى تغيير أو تطوير . منهم 51 % يمثل إنتاج المزارع الصغيره , و32 % إنتاج المربيين الصغيرين فى البيوت . و17 % بس إنتاج المزارع الكبيره اللى بتشتغل بالميكنه . وبالنسبه لنوعية الألبان اللى بتتداول فى السوق . كل شركات الألبان بيقتصرعملها على الحليب البقرى اللى بتحصل عليه من مراكز التجميع , والمزارع الكبيره . ود يعنى إن عبوات اللبن المعقم , والمبستر هى الأكتر أمان فى السوق . عكس اللبن الجاموسى اللى بيكون من نصيب بياعين اللبن السريحه , والمحلات . وده مفيش عليه أى نوع من الرقابه . وده بيعتبروه الأقل سعر , وجوده .