الثلاثى الخطر فى غش اللبن " زبدة النخيل وماء الأكسجين والفورمالين "

الكسب الحرام والسكان ونقص الإنتاج وراء 90 % من " الشغل الشمال "

طلعت الطرابيشى :

" غش اللبن " كلام مش سر " شغل شمال " . وفلوسه " سحت " , وغير صحى , وغير مشروع . ومهما تقول الناس عارفه وفاهمه , ومتعايشه معاه . تحس بينها وبينه " عشرة عمر " .. صداقه قديمه . رغم إنه كله سموم , " وبلاوى زرقه " تقصف العمر . ولسه " البعده " بيتحفونا بألاعيب جديده فى الغش . " وقال أييييييييه " شغالين فى السليم السليم . علشان الحليب يفضل طازه بخيره لأطول وقت . بيقولوا وطنيين رغم تعويم العمله , وزيادة البنزين . لسه محافظين على نفس السعر . بيبيعوا على قديمه , علشان خاطر الفقرا " الفئات الضعيفه " الأحق بالرعايه . 

صور " حلب الجاموس " فى حارات مصر زمان  

ياعم كبر كله " أونطه " . كلام للشو . تحلية بضاعه مش أكتر . تقدر تقول شغل " صعبانيات " علشان يبعدوا عنهم تهمة الغش . وبعدين من إمتى الغشاش بيدين نفسه " قالوا للحرامى إحلف قال جالك الفرج " . مهما ينفوا ظاهرة غش اللبن حقيقه قديمه فى مصر  .. بس كانت على خفافى مش زى السنين الأخيره . حالات على الضيق . ومن الخشا كانت فرص الغش محدوده . ودا مش بسبب جدعنة الناس وشهامتهم , ولا لقلبهم الطيب الأبيض , ولا علشان إن ضميرهم كان لسه " بيور " . لأ وغلوتك أبدا أبدا بسبب طبيعة البلد , وبياعين اللبن فى الوقت ده . اللى كانوا  على " نياتهم " بيسرحو " بالجاموس , والبقر " على رجليهم فى الشوارع والحارات ,  و" على عينك ياتاجر " قدام الناس يحلبوا اللبن من الجاموسه , ويبيعوه طازه بطازه .

صورة حلب اللبن فى الشوارع والحارات زمان

وعلى فكره ده مش من خيالى . دى صوره وثيقه تاريخيه منشورة فى 1915 . وقت ما كان كل سكان مصر يدوب 12 مليون نسمه . أقل من سكان محافظة واحده النهارده. زى القاهرة , أو الجيزه . وطبعا الطريقه " الزرايبى " البدائيه اللطيفه العجيبه دى ماكنتش تسمح بأى فرصه للغش , لأنها كانت مكشوفه فى العلن قدام الناس عينى عينك . ده غير إن بياعين اللبن , ومربيين البقر والجاموس زمان كانوا ناس غلابه على قدهم , لايعرفوا أيه هو " سطل اللبن " , ولا عندهم فكره بالتروسيكل . علشان يركبوه ويشيلوا عليه اللبن بدل اللف على رجليهم فى الشوارع 

و (  Step By Step  ) إبتدى الغش يشد حيله  , وشويه شويه فرصه بتكتر . وروح يازمان تعالى يازمان الناس زادت , والغلا شرحه  , و" زحمه يادنيا زحمه " اللبن بقى أقل عن حاجة الناس . وعشان يكفى مفيش غير " الشغل الشمال " هو أسهل حل . زود ميه يازكى قدره , يزود زكى قدره الميه وهب اللبن يكتر ويزيد , و" بالهنا والشفا " الكل يشرب ويهيص . ولأن الغش إتطور وإتقدم مابقاش على قديمه . وبقى له أساتذه , وناس تقيله دارسه وفهمه فى الغش ومعاها شهادات . 

5,6 مليون طن حجم إنتاجنا من الألبان  

والمفروض طبعا تكون الدنيا إتغيرت اليومين دول , بعد ماكترت مزارع المواشى الحلابه ,  ومصانع اللبن الكبيره , وبعد إنتاجنا من اللبن " الحليب الخام " زاد فى 2024 حسب تقديرات الجهاز المركزى للإحصا , لأكتر من 5,6 مليون طن . يعنى المفروض إنتاجنا بقى يكفى , وخلاص مش محتاجين للشغل الشمال , ةالغشاشين ياخدوا لهم جنب بعيد عننا . ده كان مفترض يكون . لكن " نأبنا طلع على شونه " , لأن الزيادات الكبيره دى . لسه أقل من إحتياجاتنا الـ 110 مليون نسمه . وحسب التقديرات العالميه إستهلاك  المصري مابيحصلشى نص إستهلاك أى فرد بره . يعنى مايزدش إستهلاك معظم المصريين على 25 كيلو للفرد فى اليوم . والقليل منهم اللى بيوصل لـ 50 كيلو فى اليوم . فى الوقت اللى بيعدى متوسط الإستهلاك العالمى للفرد على 100 كيلو فى اليوم . ده غير دوله زى أمريكا للفرد 180 كيلو فى اليوم . طبعا الفرق كبير بينا وبينهم . وعلشان نقرب المسافه محتاجين نضاعف إنتاجنا مرتين . ده غير لما نحسب إحتياجات   15 مليون شخص تانى غيرنا من ضيوفنا السوريين , و اليمنيين , والسودانيين , وبعض الليبيين , والعراقيين الموجودين فى مصر .

ومن غير مانفكر هانلاقى اللى يقولك الحل هو الشغل الشمال  مفيش غيره . يعنى شوية ميه من الحنفيه , و" جلا جلا " اللبن الأقليل فى غمضة عين هب يبقى كتير    . وطبعا غير الميه هتلاقى فى دقيق , ونشا , ومن " الدسم والجوامد " الدهون النباتيه , وغيرهم فى حاجات تانيه كتير . وتلاقى الناس – كالعاده - بتشرب عادى ولا على بالها . وتقولك " كماااااااااان " . ولأن " الشمال " فلوسه سهله وتغرى , وعلى طول مطلوب . تلاقى البعده " أهل السحت " مايصدقوا يفتحو على الرابع فى الغش من غير حجه . قال أيه " اللبن المغشوش " المعروف أصله وفصله زى السكر " مش عارف ليه "  . وحسب تصريحات الرئيس السابق لقسم بحوث تكنولوجيا الألبان بمركز البحوث الزراعية الدكتور حاتم حلمى للأهرام فى 2024 , غش الألبان يمثل 90 % من إجمالى حجم إنتاجنا السنوى . يعنى على عهدت أستاذ الشغله " الدكتور حاتم " مفيش لبن فى مصر بعيد عن الغش . يعنى الغش ورانا ورانا .. حاله عامه " كومبليت " , واخد العلامه الكامله . 

الدهون الصناعية بديل للقشده 

وحسب كلام الدكتور " حاتم " معظم مصانع الألبان الكبيره بتشارك فى عمليات الغش , بجانب المحلات , والبياعين " السريحه " . ومن أهم طرق الغش فى المصانع الكبيره فرز " القشده " عن اللبن " . والقشده بتعتبر هى الدهون الطبيعيه , أو الدسم , أو اللون الكريمى  اللى بيكون على وش الحليب " . وتعرف عملية فرز " فصل " القشده عن الحليب بإسم " اللبن المفرز " , أو " اللبن الخالى من الدسم ". وبعد فصل وتجنيب القشده , يتم إضافة لبن البودره , وزبدة النخيل المستوردة , واللى بتعتبر ماده دهنيه صناعيه علشان تكون بديل للقشده " الدهون الطبيعيه " . بعد تسييح دهون زبدة النخيل بالتسخين , وخلطها على اللبن المفرز . وتأتى خطوت صب الخليط  فى جهاز تجنيس تحت ضغط عالى , لتكسير وتفتيت حبيبات دهنون زبدة النخيل , لتسهيل دوبانها فى اللبن . علشان المستهلكين يطمنوا أن اللبن طبيعى وبخيره كامل الدسم . وطبعا هدف المصانع معروف , وهو زيادة أرباحهم من بيع اللبن من غير قشده على إنه كامل الدسم , وبيع القشده بعد فصلها لوحدها , لأن سعرها بيزيد على تلات وأربع مرات سعر اللبن . 

جهاز تجنيس اللبن تحت الضغط لتكسير الدهون

وطالما الغش فلوسه كتير , والحسابه بتحسب . فمش هايفرق إذا كان هايعمل عسر هضم , ولا هايوصل للحانوتى . وللعلم كل المواد والخامات اللى بيغشوا بيها ضررها بسيط . مجرد كيماويات سامه بس . وإن كان بعضها مواد طبيعيه , وغذائيه مفيده وغير ضاره . ولكن المشكله إستخدامها السئ , وغير الأخلاقى . هو اللى بينقلها من خانة المواد المفيده الطيبه بنت الناس , لخانة " الخراب الطافح " , وأخطر خطير على الصحه . 

ومن أشهر مواد غش اللبن حسب درجة خطورتها على الصحه : 

1) المواد الطبيعيه الأقل ضرر : 

• الميه والتلج : بالنسبه للميه بتعتبر أقدم أساليب الغش المعروفه فى مصر , وأسهلها . وييجى فى الترتيب التانى التلج . والإتنين واحد , والفرق إن التلج ميه متجمده . وبيتم إستخدامهم لزيادة وزن اللبن , وكثافة حجمه على غير الحقيقه . ومن عيوبهم وأضرارهم تقليل القيمه الغذائيه للبن , وسهولة الإصابه بالعدوى البكتيريه . وبيقتصر الغش بالتلج على فصل الصيف , لتلطيف الجو الحار بتبريد اللبن , لتأخير فساده . 

• النشا والدقيق : بيسهلو التلاعب فى وزن وقوام اللبن , وتغيير خواصه  , وخفض قيمته الغذائيه . وكمان بيخفو عيوب إرتفاع الحموضه و" تجبن اللبن " فساده  . 

• الزلال " بياض البيض " : بيستخدم فى غش اللبن عن طريق خلط بياض البيض النى مع الحليب . طبعا علشان يخفى الغش بالميه , وزيادة كثافة اللبن , ومايظهرش الفرق بين بروتين بياض البيض اللى إضاف , والقشده اللى تم نزعها من اللبن . ومن أضراره بياض البيض أنه بيسهل نقل بكتيريا السلامونيلا الضاره , ويسبب تسمم غذائى .

• الجيلاتين : من عيوبه أنه لما بيزيد من لزوجة اللبن , وقوامه ووزنه , بيخفى غشه بالميه , ونزع القشده والدسم من اللبن .

• الملح : ظاهرة الغش بالملح منتشره فى المزارع , والبيوت , والبياعين السريحه . وهى مضره بالصحه لأنها بتساعد على  زيادة وزن وكثافة اللبن , وبيخفى غشه بالميه . وبتم عن طريق خلط الملح بالنشويات زى النشا أو , والدقيق , لزيادة لزوجة اللبن  .

المواد والخامات الكيماوية السامه شديدة الضرر :

• بيكربونات الصوديوم : هى ماده كيماويه شديدة السميه . بيستخدموها فى غش اللبن بحجة منع تخمر اللبن , ومنع نمو البكتيريا . وتعرف " بصودا الخبز " . وهى عباره عن أملاح الأحماض الكربوكسيلية . وأهميتها إنها بتسرع فى تخمير " العجين " , وتخليه هش وخفيف , وفي صناعة الصابون ، والمبيدات الحشرية والفطرية الطبيعية , ومحسنات التربة لتقليل الملوحة . 

• الفورمالين : مادة كيماويه شديدة الخطر . وزاعت شهرتها فى الأطعمه ومنها اللبن كماده حافظه . وبيستخدموها كتير فى اللبن على إنها ماده مطهره للتخلص من البكتيريا , ومنع التخمر  . ومن بين إستخداماتها تحنيط جثث الموتى , والحيوانات النافقه , وتصنيع المواد اللاصقه , والبلاستيك , والمنظفات . وبتسبب الإصابه بالأورام السرطانيه , وأمراض القلب , والجهاز الهضمى .   

• ماء الأكسجين :  ماده كيماويه ضاره على الصحه , وملهاش أى علاقه بحفظ اللبن . ورغم كده بيغشوا بيها اللبن , لزيادة فترة صلاحيته .  وهى فى الأصل بتستخدم فى تبييض الأسنان , وتطهير الجروح , والتنظيف  .

• اليوريا : مادة كيماويه ملوثه تستخدم فى حفظ اللبن , ومد صلاحيته , رغم خطورتها الشديده , وبالمخالفه للتحذيرات . ويغلب إستخدامها فى إنتاج العلف لتغذية الحيوانات , وفى الأسمده لتغذية النبات لغناها بالدهون , والبروتينات . وتسبب اليوريا الفشل الكلوى .

• بودرة السيراميك : هى عباره عن الحجر الجيرى أو " كربونات الكالسيوم " , ويمثل إستخدامها فى غش اللبن جريمه غير فى حق كل المصريين . لأنها مادة كيماوية شديدة السميه . وللطف ربنا علينا إستخدامها محدود فى غش منتجات اللبن . ويسبب إستخدامها الفشل الكلوى , والكبد , والإصابه الأورام السرطانية .

• بنزوات الصوديوم , وسوربات البوتاسيوم , والناتاميسين هى مواد كيماويه وشايعة الإستخدام فى حفظ الأغذية . وينتشر إستخدامهم فى اللبن لمنع التعفن , والتخمر , ونمو البكتيريا . وبجانب حفظ اللبن تعمل بنزوات الصوديوم , وسوربات البوتاسيوم فى صناعات الأدويه , ومستحضرات التجميل , والدهانات , والبلاستيك . وبالنسبة للناتاميسين فهو عباره ع , ومضاد حيوى , وفطريات